İngiltərənin aparıcı həmkarlar ittifaqlarından biri olan GMB bəzi peşə sahələrində çalışan şəxslərin sidik kisəsi xərçəngi riski ilə daha çox üzləşdiyini açıqlayıb.
Milli.Az xəbər verir ki, həmkarlar ittifaqının son üç ildə xəstəliyə yoluxan üzvləri üzərində apardığı araşdırmalar göstərib ki, sidik kisəsi xərçəngi hallarının təxminən 6 faizi iş yerində kimyəvi maddələrə məruz qalmaqla əlaqəlidir. Mütəxəssislər bu nəticələrin təhlükəli iş mühitinə diqqət yetirilməsinin vacibliyini bir daha gündəmə gətirdiyini bildiriblər.
NTV-nin “The Mirror”a istinadən verdiyi məlumata görə, aşağıdakı peşə sahələrində çalışan şəxslər bu xərçəng növünə daha çox meyllidirlər:
Səhiyyə işçiləri
Sürücülər
Təmizlik işçiləri
Rəssamlar
Bərbərlər
Qida istehsalı ilə məşğul olanlar
Bu şəxslər iş zamanı müxtəlif kanserogen maddələrlə daha çox təmasda olduqları üçün daha böyük risk altındadırlar.
Böyük Britaniyanın Xərçəng Araşdırmaları Mərkəzinin məlumatına görə, ölkədə hər il təxminən 10,500 yeni sidik kisəsi xərçəngi hadisəsi qeydə alınır. Bu isə gündə orta hesabla 29 yeni xəstə deməkdir. Bu növ xərçəng kişilərdə yeddinci, qadınlarda isə on yeddinci ən çox rast gəlinən onkoloji xəstəlikdir.
Sidik kisəsi xərçənginin ən çox rast gəlinən simptomu sidikdə ağrısız qan olmasıdır. Bu qan parlaq qırmızı, çəhrayı və ya bəzən kola rəngində ola bilər. Digər əlamətlərə isə aşağıdakılar daxildir:
Tez-tez sidiyə getmək
Qəfil tələsik sidiyə çıxma hissi
Sidik zamanı yanma və sancma
Qasıq və ya bel nahiyəsində ağrı
Sümük ağrıları
Ayaqlarda şişkinlik
İstəmədən arıqlama
Əgər bu peşələrdə çalışırsınızsa və ya bu əlamətləri hiss edirsinizsə, mütləq şəkildə həkimə müraciət edin. Erkən diaqnoz və profilaktik tədbirlər həyatınızı xilas edə bilər.
