Lüks brendlər satılmamış məhsulları niyə məhv edirlər?
Showaz.net xarici mediaya istinadən xəbər verir ki, dünyanın məşhur lüks brendlərindən bəziləri hər il milyonlarla dollar dəyərində olan satılmamış məhsulu məhv edirlər.
Bunun müəyyən səbəbləri var:
1. Brendin mövcud dəyərinin qorunması
Lüks brendlər üçün eksklüzivlik əsas prioritetlərdən biridir. Əgər bir brendin məhsulları endirimə gedərsə və ya çox asanlıqla əldə edilə bilərsə, o zaman eksklüzivlik hissi azalır və brendin prestiji zədələnir. Bu səbəbdən satılmamış məhsulları məhv edərək onların bazarda ucuz qiymətə satılmasının qarşısını alırlar.
2. Qara bazarı və saxtakarlığın qarşısını almaq
Məşhur brendlər məhsullarının endirim mağazalarında və ya ikinci əl bazarında satılmasını istəmirlər. Əks halda, saxta məhsulların brendin imicini zədələmək riski artır. Satılmamış məhsulları məhv edərək şirkətlər onların qeyri-qanuni şəkildə bazara çıxmasının qarşısını alırlar.
3. Endirim strategiyasından imtina
Əksər lüks markalar, “fast-fashion” brendlərindən fərqli olaraq böyük endirim kampaniyaları keçirmirlər. Əgər satılmayan məhsullar endirimlə satılsa, bu, gələcək müştərilərin məhsulu orijinal qiymətinə almaqdan imtina etməsinə səbəb ola bilər. Brendlər müştəriləri hər zaman yüksək qiymət ödəməyə alışdırmaq istəyirlər.
4. Vergi və gömrük
Bəzi ölkələrdə şirkətlər satılmamış məhsulları məhv etdikdə vergi üstünlüklərindən yararlana bilirlər. Bu da bəzən məhsulları satmaqdan daha sərfəli olur.
5. Alternativ yollar: xeyriyyəçilik və təkrar emal
Bəzi brendlər bu siyasətə alternativ olaraq məhsulları məhv etmək əvəzinə xeyriyyə təşkilatlarına bağışlamağa və ya təkrar emal etməyə başlayıblar. Məsələn, “Burberry” 2018-ci ildə tənqidlərlə üzləşdikdən sonra artıq məhsullarını məhv etməyəcəyini və onları daha ekoloji üsullarla emal edəcəyini açıqladı.
Bəs siz bu barədə nə düşünürsünüz?
